God og ekte hardangersider skal vera produsert med naturleg gjæring. Sideren skal smaka eple, den skal ha god lukt av friske eple når ein opnar flaska og vera klår og brusa lett med det same den kjem i glaset. Sideren skal vera behageleg å drikka.
Sider er rett og slett gjæra råsaft av eple. I Europa vert det laga sider i dei områda der vinrankane synest det er for kaldt eller vått.
Siderproduksjonen er stor i Nord-Frankrike, i Sør-England og i Baskerland og andre deler av Nord-Spania.
Frankrike er ikkje berre ein stor vinprodusent, dei produserer også mest sider i verda. År om anna drikk franskmennene godt over 100 millionar liter. Normandie er siderdistrikt nummer ein, tett fylgt av Bretagne.
På same måte som vinbøndene foredlar druene vidare til druebrennevin, dei mest kjende sortane kjem frå fylket Cognac, lagar siderprodusentane sitt brennevin. Fylket Calvados i Normandie har gitt namn til denne drikken.
Sider vert også laga i Norden. Her i landet er den gyldne drikken si vogge i Hardanger. Frå slutten av 1800-talet og fram til 1919 då Stortinget vedtok alkoholforbod, var sider frå Hardanger salsvare. No står Hardanger siderprodusentlag i spissen for at sider igjen kan verta næring på gardsbruk saman med reiseliv og andre kulturtilbod.
Kunsten å laga sider heldt fram som meir eller mindre avansert hobby i kjellarane ved fjorden. Mange lagar drikke av god kvalitet og på slutten av siste hundreåret tok Hardanger Cideri med Sjur Jaastad og Øyvind Lund i spissen, til med vanskelege arbeidet å få løyve til å omsetja sider på lovleg vis.
Seinare vart Hardanger siderprodusentlag skipa. Laget har kring 40 medlemer. Frå 1. juli 2003 vart det gjort endringar i alkohollova som gjer at siderprodusentar kan få løyve til å produsera og skjenkja eigen sider i eigne godkjende lokale. Dei same produsentane kan også selja til serveringsverksemder og Vinmonopolet.
Siderkonkurransen under Morellfestivalen på Lofthus vonar å lokka siderprodusentane ut av kjellaren slik at dei kan by fram sin eigenproduserte sider! Konkurransen er og open for morellvin og andre vinar lagd av lokale frukt og bær.
Til no er to sortar norsk sider komen i hyllene på Vinmnopolet:
Fyrst ute var bergensaren Njaal Vindenes med Krunesider 2003 som vert produsert av Kalfarets Kultur AS. I listene til Vinmonopolet vert han skildra slik: Middels dyp brungul. Tiltalende eplepreget aroma med toner av treverk. Middels fylde. Halvtørr, musserende. Sideren er laga av 70 prosent Aroma, 20 prosent Gravenstein og 10 prosent Torstein, og inneheld 10,5 prosent alkohol.
Hardanger Cider Tradisjonell er namnet på den fyrste polsideren som er produsert i Hardanger. Nils J. Lekve i Hardanger saft og siderfabrikk leverte debutflaskene i sommar. Vinmonopolet si skildring er slik: God friskhet, fylde og fruktighet. Smak og duft av modne epler. Halvtørr og vidare konsumferdig, men kan fortsatt oppbevares.
Elmero Frisør | Hardanger Teknikk | Inst.Johs. Ystanes AS | Tunvoll Trimstove | Ullensvang Frisørsalong | Rutle VVS | Lofthus Auto | Halldor Utne AS | Mikkelparken | B Mikkelsen AS | Lofthus Camping | Lofthuskiosken
Copyrights ©2007-2010 Morellfestivalen. All rights reserved.
