Historie

Ideen til denne festivalen kom frå Ullensvang herad og landbruksetaten / fruktdyrkarmiljøet. Hovudgrunnen til å skipa denne årlege aktiviteten på Lofthus var å fremja kunnskap om morelldyrkinga i Ullensvang. Festivalen skulle vera eit samarbeid mellom fagdyrkarmiljøet, heradet, ymse organisasjonar og einskild personar.

Den fyrste festivalen vart gjennomført i 1996. Eit trekkplaster gjennom alle år har vore NM i morellsteinspytting. Ronny Boge frå Steinvik i Fusa spytta det 1. året ein morellstein 9,8 meter.

Festivalen skulle alltid gjennomførast siste helg i juli, med handverkstorg og utstillingar, samt sal av lokalprodusert mat.

Opp gjennom åra har det vore mange ulike tilbod om båtturar på fjorden, gardsvitjingar og hagevandringar, hesteriding, konsert, folkedans, kakekonkurranse, smaking og kåring av beste eplecider og morellevin, kåseri, revy og dans.

I 1997 vart den tredje internasjonale morellsymposiet - med ekspertar frå 26 land - halde på Lofthus same helg som Morellfestivalen. Festivalen vart opna av fylkesordførar Magnar Lussand, rådmann Magnus Mjør og direktør i Reisemål Hardanger Fjord Helge Møller. Det året var det også ei utstilling om norsk fruktdyrking, og på Hardangerutstillinga var Odd Nerdrum, Roald Tellnes og Dagfinn Instanes representert. På Skredhaugen hadde Anne Ljones ei separatutstilling med rosemåling.